Presidenti serb, Aleksandar Vuçiç pritet të zhvillojë një takim me kancelaren gjermane, Angela Merkel në ditët në vijim.
Mediat serbe bëjnë me dije se dy zyrtarët do të diskutojnë për zgjidhjen e çështjes së Kosovës.
“Unë nuk mendoj se ka ndonjë plan të ri që do të diskutohet. Askush nuk mund të dalë me një plan dhe të thotë merre ose lëre atë”, ka thënë Vuçiç.
Ndërkohë, Merkel i ka dërguar ditën e djeshme kryeministrit të Kosovës, Albin Kurtit një ftesë për t’u takuar në Berlin.
Në letrën e Kancelares thuhet se para qeverisë së re janë detyra të rëndësishme si sundimi i ligjit, luftimi i korrupsionit dhe krimit të organizuar. Ajo ka thënë se Kurtin e presin punë të vështira në luftimin e krimit dhe korrupsionit dhe përmirësimin e gjendjes ekonomike.
“Këto janë hapat kryesor në përforcimin e perspektivës Evropiane të vendit tuaj”, thuhet në letrën e kancelares drejtuar Kurtit.
