Gjykata e Tiranës caktoi masën e sigurisë “Arrest shtëpie” për Shpëtim Selimin, një nga protestuesit e Astirit.
Ky i fundit u arrestua pas incidentit shënuar pak ditë më parë në zonën e Astirit, ku disa persona plagosën 4 punonjës të IKMT-së. Të cilët ishin duke njoftuar banorët për objektet që preken nga projekti i “Unazës së Madhe”.
Ish-deputeti demokrat, Klevis Balliu u shpreh në një prononcim për mediat se është absurde që Gjykata pas arrestimit, i lënë arrest shtëpie.
Sipas tij, nuk janë banorët ata që nxisin konflikt, por qeveria. Sepse nuk pranojnë të ulen në dialog me qytetarët që preken nga projekti i rrugës.
“Pasi i arrestojnë i lënë në arrest shtëpie. S’ka më absurd! Kur duan t’i shembin shtëpinë, i lënë në arrest shtëpie. Dialog duan banorët e Unazës.
Partia Demokratike ka kërkuar me qindra herë që qeveria të sjell një përfaqësues dhe të dialogojë me protestuesit. Duhet dialog.
S’e dimë pse qeveria kërkon përplasje me doemos sepse nuk pranojnë dialogun. Në disa media është raportuar se disa banorë kanë marrë një shpërblim. Po e marr të mirëqenë se me 8 veta qenka bërë dialog dhe se janë marrë shpërblime. Po me pjesën tjetër?!
Kur politika hyn nga dera në gjykatë, drejtësia del nga dritarja. Shteti ka marrë fund. Këtu ka krizë totale. Zgjidhja e këtij problemi nuk mund t’i jepet nëse nuk kthehet në pushtet sovrani”, deklaroi Balliu.
