Në konferencën e përbashkët për mediat në kuadër të “Shengenit Ballkanik”, kryeministri Edi Rama kërkoi hapjen e kufirit me Kosovën, sikurse në të gjithë Ballkanin Perëndimor.
Ndërsa kritikoi ata që e quajnë këtë projekt një “mini-shengen”, duke u shprehur përmes ironisë se vet është 198 cm i gjatë.
“Qytetarët kanë kaq vite që heqin të zitë e ullirit në kufirin mes Kosovës dhe Shqipërisë, me mallra që presin me orë dhe ditë. Do donim që njësoj si në të gjithë Ballkanin Perëndimor që dhe mes Shqipërisë dhe Kosovës të hapej kufiri. Heqja e kufirit nuk është një “minishengen”. Mini-shengen nuk e di kush e gjeti, mua nuk më konvenon. Duke qenë 198 cm, nuk jam ndjerë kurrë pjesë e një mini.
Janë miliarda euro që rajoni i humb nga ky lloj barikadimi (kufiri), që i ka dalë koha dhe funksioni. Kufiri mes Shqipërisë dhe Kosovës njësoj si të tjerët të zhduket. Kjo ka dakordësinë edhe të palëve të tjera përfshirë edhe Serbinë”, deklaroi Rama.
Po ashtu, në prani të presidentit serb Aleksandër Vuçiç dhe kryeministrit të Maqedonisë së Veriut, Zoran Zaev, Rama theksoi se ata që mendojnë për krijimin e ‘Shqipërisë së Madhe’ apo dhe Jugosllavisë së re, sipas tij, bëjnë mirë të heshtin.
“Kush flet për Jugosllavi mbase ka jetuar shumë gjatë sepse unë nuk kam jetuar dhe nuk kam asnjë kujtim. Kush flet për një Shqipëri të Madhe duhet të heshtë. Nuk ka mundësi që unë të jem edhe mini-jugosllav edhe shqiptaromadh, jam një qytetar europian”, shtoi kreu i qeverisë.
Denonco ne TT