Trajneri i Kombëtares së Shqipërisë, Edi Reja doli ditën e sotme në një konferencë për mediat, ku publikoi listën me 26 lojtarë që do të grumbullohen në sfidën ndaj Andorrës dhe Francës.
Ndeshja ndaj Francës do të jetë dhe takimi përurues për stadiumin e ri, që nga e hëna do të quhet “Air Albania Stadium”.
Kuqezinjtë do të luajnë më 14 nëntor në “Elbasan Arena” kundër Andorrës, ndërsa tre ditë më vonë në kryeqytet kundër Francës.
I pyetur për ndeshjen e parë në stadiumin e ri, Reja u shpreh: “Është një emocion mjaft i bukur për mua dhe të kem fatin të debutoj unë këtë stadium. De Biazi dhe Panuçi do të jenë xhelozë për këtë fakt.
Kam ftuar vajzën dhe gruan për këtë sfidë. Do të na japë një stimul të madh për të marrë rezultatet. Shpresoj që ky stadium të jetë kartëvizita jonë, për të dhënë një imazh të Shqipërisë së re dhe rritjes”.
Ndërkohë, iu bën thirrje tifozëve kuqezi që të jenë prezentë në stadium dhe t’i mbështesin në sfidën ndaj Andorrës. “Pa tifozë nuk ka futboll. Na ndihmoni që të marrim rezultat të mirë, pasi është ndeshje shumë e rëndësishme”, nënvizoi Reja.
