Edhe gjatë seancës së sotme në Kuvend, nuk kanë munguar përplasjet. Në të njëjtën kohë është shprehur kundërshtia nga disa deputetë të opozitës, për mbajtjen e maskës me detyrim. Gjatë fjalës së marrë në Kuvend, deputeti Lefter Maliqi ka hedhur akuza në drejtim të ministrit Lleshaj, ndërsa i konsideroi të dhënat e tij për situatën me kriminalitetin dhe kanabisin në vend si “false”.
Nga foltorja e Kuvendit, Maliqi tha se Lleshaj po përdoret nga Rama, ndërsa shtoi se ky i fundit e ka larguar atë edhe nga mbledhja e PS.
“Sot nuk kemi analizë vjetore të shifrave farsë, po bëre mirë që lexove, se po mos lexoje do ngatërroje dhe ndonjë shifër. Por po të dëgjonte kryeministri, po të bëje ndonjë gabim tjetër, se ca ke probleme në PS, ca je me probleme në qarkun Lezhës që nuk e drejton dot, ca në mbledhjen e PS, që të ka përzënë nga zyra dhe bëre mirë që lexove. Por shqiptarët nuk kanë nevojë për lexime farsë.
I lini këto përralla me shqiptarët, se ata e dinë që po pati vullnet politik, për dy vite vendoset rendi. Kryeministri ju përdor për qëllimet e tij mafioze, dhe uroj mos të kesh fatin e Tahirit. Edhe pse Tahiri ishte socialist, i vetmi gabim që bëri, përdorimi që i bëri për drogë. Me vjen keq për ty që nuk je as socialist, e as rilindas”, tha Maliqi.
Nga ana tjetër, Ministri i Brendshëm, Sandër Lleshaj ka sfiduar deputetin Lefter Maliqi, që t’i nënshtrohet Vettingut për të sqaruar dhe arsyet se përse dy herë është larguar nga Policia e Shtetit.
“Meqënëse ra fjala tek Vettingu. Ju si ish-punonjës përfitoni një Vetting gratis. Se dhe do flasim personalisht. Iu rekomandoj ta bëni dhe t’i thoni shqiptarëve pse jeni larguar dy herë nga Policia e Shtetit. Shifrat në bëjnë të besueshëm. Se fantazi bën kushdo këtu”.
Ruçi: Iu lutem z. ministër, duhet të jemi rigoroz me kohën.
Sandër Lleshaj: I kemi të shkruara, fjalët i merr era dhe e shkruara mbetet. I kemi për të qënë të kapshëm publikisht.
