Përplasje dhe tone të larta ka ndodhur mes gazetarit Artan Hoxha dhe ish-deputetit të PD-së Mark Marku në studion e emisionit “Opinion”. Ka qenë një fjali e Artan Hoxhës që tha se Basha mund ta kishte shmangur gjithçka ndodhi në protestë, që ka sjellë reagimin e Mark Markut, që pasoi: “Ju po thoni sikur ata po hanin byrek aty, dhe doli Basha dhe i sulmoi”. Ata janë përplasur ashpër teksa po komentonin zhvillimet e të shtunës pas protestës së dhunshme në selinë blu. Teksa gazetari po tregonte me kronologji ngjarjet e të shtunës, Mark Marku ka ndërhyrë duke thënë se ngjarja po deformohet, duke thënë me ironi se protestuesit poshtë nuk po hanin byrek dhe Basha i sulmoi.
Pjesë nga debati
Artan Hoxha: Nuk u zhgënjeva nga kjo që bëhej, e di që kjo është taktika që vepron gjithmonë Berisha. Zhgënjimi ishte nga Basha. Në protesta të tilla, Berisha është njeriu i aksionit. Basha mund ta shmangte këtë gjë, duke dalë nga selia.
Mark Marku: A mundet pak?
Artan Hoxha: Jo 1 minutë… Një fjali të fundit kam, e mbylla.
Mark Marku: S’kemi ardhur të të dëgjojmë ty se të kishim dëgjuar në shtëpi ne. E paska fajin Basha që sulmojnë ata.
Artan Hoxha: Jo, nuk e thashë atë gjë.
Mark Marku: Ju po thoni sikur ata po hanin byrek aty, dhe doli Basha dhe i sulmoi.
Artan Hoxha: Mark po më dëgjove, thashë tjetër gjë.
Mark Marku: Mos u tallni tani. Ju po harroni gjënë kryesore.
Blendi Fevziu: E doni Hoxhën këtu?
Mark Marku: Jo, jo, s’ka kuptim, kështu se është turp.
Artan Hoxha: O Mark, turp është ajo që i çoni demokratët në këtë derexhe. Ky është turp, dhe t’ju vijë turp që i keni çuar kështu. Që i merrni bishta kazme dhe qëllojnë njëri-tjetrin. Opozita e Shqipërisë dhe del ai me qese domate Kryeministri. Ky është turp dhe duhet t’ju vijë turp që i keni katandisur kështu. Turp është ky që i keni bërë Shqipërisë dhe demokratëve.
