Kryedemokrati Basha mblodhi paraditen e sotme, grupin e punës për zgjedhjet në Forumin Rinor të Partisë Demokratike. Në një prononcim për mediat, kreu i PD-së, Lulzim Basha mohoi që të ketë udhëzuar për garën në forum sepse drejtuesi aktual i saj, Belind Këlliçi, i është bashkuar foltoreve të Sali Berishës.
Shpallja e zgjedhjeve për kryetarin e ri të Forumit Rinor të Partisë Demokratike, ka sjellë një përplasje mes Bashës dhe kreut aktual të FRPD-së, Belind Këlliçi, me këtë të fundit që thotë se është shkelur statuti. Zgjedhjet në këtë forum vijnë dy vite pas mbarimit të mandatit të Këlliçit. Basha udhëzoi nisjen e procesit të rifreskimit të strukturave dhe ngritjen e një grupi pune, që do të mbikëqyrë procesin, pasi mandati i shumicës dërrmuese të drejtuesve të FRPD-së ka mbaruar dhe një pjesë e drejtuesve kanë tejkaluar moshën.
“Nuk është aspak e vërtetë, kjo është sajesë e fabrikuar për interesa personale. Për herë të parë, nën drejtimin tim, FRPD ka zhvilluar zgjedhje, madje zgjedhje 1 anëtar 1 votë për kryetarin. Prej 2 vitesh, mandati i forumeve drejtuese dhe kryetarit ka skaduar dhe në përputhje me normat demokratike, përsëri me parimin 1 anëtarë, 1 votë, të rinjtë dhe të reja do të zgjedhin përfaqësuesit e tyre duke përfshirë edhe kryetarin. Kemi shumë sfida përpara, po asgjë nuk mund të pengojë PD që të zbatojë normat statutore të demokracisë dhe aq më pak interesat personale të pengojnë funksionimin e parimeve të tilla siç është 1 anëtar, 1 votë”, tha Basha.
