Përfaqësuesja e OBSH-së në Shqipëri, Bettina Menne shprehet se vendi ynë ka pasur më pak të vdekur nga koronavirusi në krahasim me shumë vende të Evropës.
E ftuar në emisionin “Real Story”, Menne tha se disa prej masave kufizuese të ndërmarra kanë ndihmuar në parandalimin e përhapjes së pandemisë në mënyrë masive.
Menne thekson se masat e higjienës dhe distancimit social duhen respektuar ende.
“Në Shqipëri fatkeqësisht vetëm 31 persona kanë humbur jetën. Sot ka vetëm 3 persona në kujdes intensive. Kurba është ruajtur mirë. Ka vatra të nxehta si Tirana, Durrësi, Kruja, Shkodra etj që ju i quani zona me rrezik. Fatkeqësisht në Shqipëri humbën jetën disa persona, por për fat të mirë këtu nuk ndodhën kaq shumë vdekje. Masat do kenë qenë të suksesshme, pasi përndryshe do kishit problem të madh me spitalet sidomos. U ndal fluturimi me avionë, u ndalua lëvizja për aq sa e ishte e mundur, u ndalua kontakti fizik që të mos transmetohej virusi nga njeriu tek njeriu, sidomos tek ata persona që kanë sëmundje shoqëruese. U morën masa si ulja pak larg nga njëri tjetri në bare, kudo. Duhet vazhduar me kujdes të madh me masat e higjienës dhe me shmangien e kontakteve që mund të kenë rrezik”, tha ajo.
Sipas saj, edhe vendet e tjera nëpër botë që kanë marrë masa të menjëhershme, kanë pasur më pak të vdekur dhe të infektuar me koronavirus.
“Si është e mundur që në Shqipëri një komitet teknik u mblodh në fund të janarit? U morën masa, ndërsa në vende të tjera nuk ndodhi kjo gjë. Vendet që morën masa menjëherë janë më pak të prekura nga pandemia e Covid-19. OBSH përbëhet nga vendet e veta. Në Shqipëri u mblodh komiteti në fund të janarit, kurse në vende të tjera u mblodh më herët. OBSH nuk ka vetëm hetim të brendshëm, por do marrë për bazë të gjitha fazat e pandemisë. Hetimi ndërkombëtar do të shikojë punën që kanë bërë të gjitha vendet anëtare”, shtoi ajo.
