Një 35-vjeçar është vënë në pranga, pasi ka abuzuar me një 26-vjeçare në Lushnje. Specialistët për Hetimin e Krimeve në Komisariatin e Policisë Lushnjë, ndaluan shtetasin V.F., 35 vjeç, banues në Savër, Lushnjë.
Ky shtetas dyshohet se ka kryer marrëdhënie seksuale me dhunë me një shtetase 26-vjeçare. Të dy e kishin lënë të konsumonin një kafe, por gjatë bisedës 35-vjeçari i ka propozuar të rrinin më gjatë bashkë.
E reja ka pranuar të qëndrojë me të, por kur ai i ka kërkuar të kryejnë marrëdhënie seksuale, ajo ka kundërshtuar. 35-vjeçari ka përdorur forcën, duke abuzuar seksualisht me të. Ky veprim ka detyruar 26-vjeçaren t’i drejtohet Policisë së Lushnjës.
Në lidhje me këtë ngjarje, grupi hetimor ka marrë edhe dëshminë e 26-vjeçares, e cila ka treguar se si ka abuzuar 35-vjeçari teksa kishin dalë për takim. Nga ana tjetër, gjatë marrjes në pyetje 35-vjeçari mësohet të jetë shprehur se nuk ka vepruar pa dëshirën e vajzës. Sipas tij, ajo është duke gënjyer për këtë rast, pasi gjithçka ka ndodhur me dëshirën e të dyve.
