Të moshuarit që u grabitën në fshatin Pishë të Fierit, kanë dhënë disa detaje lidhur me autorin për të cilin pretendojnë se e njohin.
Ngjarja ndodhi rreth orës 23:00 të së shtunës, teksa çifti kishte rënë për të fjetur. Gruaja, Athinaja tregon se autorin e ka njohur dhe ka qenë i pamaskuar. Ai i ka kërcënuar me sëpatë dhe i ka kërkuar lekët e pensionit. E moshuara shton më tej se grabitësi ka qenë i dënuar në Itali, dhe së fundmi ka dalë nga burgu.
“E njohëm autorin, ai na kërcënoi me sëpatë. Na grabiti lekët që do të blinim dru për dimrin. E njohim, e ka shtëpinë afër nesh. Policia e arrestoi në një shtëpi këtu pranë. Ka qenë i dënuar në Itali, tani ka dalë nga burgu. E mbante kështu sëpatën….I thashë për sytë e ballit, nuk kam lekë të tjera”, tregoi gruaja.
Nga ana tjetër, bashkëshorti i saj tha se autori kishte thyer xhamin e derës dhe kishte hyrë brenda.
“Unë jam vetëm me plakën. Ramë në gjumë. Në orën 11 të natës, 11:20 na trokitën në derë. Dolëm në derë pas erdhi prapë përpara, me një sëpatë që kishte në dorë theu xhamin, e hapi vetë çelësin nga brenda. I thashë merri lekët, se kisha frikë mos ishte me njeri tjetër. Ouu frikë, e dëgjoi gjithë lagjja. Shtëpinë e ka këtu, 50 metër”, tha ai.
