Nga: Mentor Kikia
Presidenti Meta foli sot sërish për nevojë urgjente të zgjidhjes së krizës. Iu drejtua personalisht Ramës, që të tregojë lidership, pasi, sipas tij, “ky është pikërisht momenti kur koha nuk punon më për ty dhe ti fillon e gënjen veten se do gjesh një rrugë justifikimi për dështimin tënd të sigurt”.
Të gjithë flasin për zgjidhjen e krizës, të gjithë kërkojnë zgjidhjen e krizës, të gjithë kërkojnë bisedime dhe marrëveshje.
Por si, për çfarë?
Askush nuk ka hedhur deri tani në tryezë një ide. Për çfarë do të bisedojnë palët dhe për çfarë duhet të merren vesh. Opozita e ka humbur fillin. Qeveria nuk ra me protesta dhe molotov. Pasi nuk ndaloi dot as zgjedhjet në 30 qershor, po përpiqet të ndalojë kryetarët e rinj të futen në zyra. Rama është komod. Ai e mori edhe bashkinë e Devollit.
Eshtë detyrë e opozitës të ketë një platformë tani që t’ia vërë qeverisë dhe gjithë shqiptarëve në tryezë. Në vend që të zërë derën e bashkisë së Kavajës, opozita duhet të ketë një paketë kërkesash tani, që të jetë edhe një strategji për të ardhmen, për të nisur një diskutim publik jo vetëm me socialistët.
Unë po e bëj një sugjerim:
1 – Të bëhet reformimi i sistemit zgjedhor. Në vend të sistetmit të pastër proporcional me lista të mbyllura, të aplikohet sistemi i përzjerë, mazhoritar me elementë të proporcionalit, me lista të hapura.
2 – Të bëhet përmirësimi i ligjit për financimin e partive, me qëllim sigurimin e një transparence më të madhe të burimeve financiare.
2,1 – Të konsiderohen si financime edhe donacionet financiare ose materiale të vetë kandidatëve.
2.2 – Të bëhet monitorimi i pavarur i shpenzimeve gjatë fushatave elektortale, dhe jo thjeshtë auditimi i deklarimeve të vetë partive pas përfundimit të zgjedhjeve.
2.3- Konsiderimin krim elektoral të përdorimit të aseteve shtetëror, njerëzore dhe materiale, për llogari të fushatës elektorale, qoftë në pushtetin qendror ashtu dhe në atë vendor.
3 – Të kërkohet(të tërhiqet edhe organi i prokurorisë në një angazhim publik), për të hetuar me prioritet dhe me transparencë dosjet që kanë të bëjnë me krimin elektoral.
4- Sanksionimi dhe deklarimi publik i vullnetit politik, për të nxituar dhe mbështetur plotësimin sa më parë të Gjykatës Kushtetuese dhe shqyrtimi prej saj me prioritet i padisë mbi ligjishmërinë e zgjedhjeve të 30 qershorit 2019
5 – Sanksionimi i zgjedhjes së presidentit të republikës me votë nga populli, si mënyrë për ti dhënë fund pazareve politike në emërimin e kryetarit të shtetit.
