Partia Demokratike ka paditur më 18 mars Lleshajn dhe Policinë e Shtetit, ku i akuzon ato për shkelje të ligjit, duke shpërdoruar detyrën në protestat e zhvilluara nga 16 shkurti deri në 16 mars.
Padia u depozitua nga sekretari i përgjithshëm i PD, Gazment Bardhi, ndërsa tashmë Prokuroria e Tiranës ka regjistruar kallëzimin penal ndaj Ministrit të Brendshëm, Sandër Lleshaj dhe Policisë së Shtetit.
Sipas pretendimeve të PD-së, policia me përdorimin e gazit lotsjellës dhe ujit me presion, nuk ka pasur synim zbatimin e ligjit por pengimin e zhvillimit të protestës.
Prokuroria pritet të hetojë mbi veprimet e policisë gjatë protestave të opozitës. Gjithashtu në organin e akuzës është thirrur për të dhënë sqarime të mëtejshme dhe sekretari i përgjithshëm i Partisë Demokratike, Gazment Bardhi. Ai pritet të paraqitet në prokurorinë e Tiranës të hënën në orën 12:00, pas thirrjes nga oficeri i policisë gjyqësore.
