Festivali i fundvitit shkaktoi një lum akuzash. Fansat e secilit këngëtar, si rrallë herë mbetën të pakënaqur. Një garë e fortë ishte ajo ndërmjet Elvana Gjatës dhe Arilena Ara. Madje, më herët se të startonte festivali, u pretendua se trofeun do e merrte Elvana Gjata.
Pas marrjes së çmimit të parë, Elvana shfaqi shenjat e para të hatërmbetjes, e në këtë ‘lojë’ u fut edhe moderatorja Alketa Vejsiu. Jo shfaqi haptazi simpatinë për të, madje i dedikoi edhe një status në Instagram. Kaq mjaftoi që Arilena ta hiqte Alketën nga Instagrami. Me të njëjtën monedhë ia ktheu edhe kjo e fundit.
Pas polemikave të forta që pasuan zgjedhjen e kengës fituese, Drejtori i Radio Televizionit Shqiptar, Thoma Gëllçi ka thënë se së shpejti do të bëhet edhe analiza e festivalit. Sipas Gëllçit, pritet të bëhet analiza e festivalit, e cila do të jetë e hapur për shtypin edhe për gjithë publikun e interesuar.
Ai thekson për “Panorama” se “vendimi i jurisë është i pavarur dhe i padiskutueshëm”. Arilena Ara do të na përfaqësojë në Eurovizion vitin e ardhshëm, ndërsa gara ka qenë e fortë mes saj dhe Elvana Gjatës.
