Kryesore

Patozi: Nesër është 17 maji. S’kam për të lejuar pazaret mes Ramës e Bashës!

               Publikuar në : 19:28 - 16/05/19 marsela

PD dhe LSI kërkojnë të jenë pjesë e procesit zgjedhor më 30 qershor. Dy forcat politike, pas djegies në bllok të mandateve të deputetëve, kërkojnë të kenë anëtarët e tyre, pra të PD-së dhe LSI-së, në Komisionet e Zonave të Administrimit Zgjedhor.

Pas këtij vendimi, një reagim ka ardhur nga Astrit Patozi, i cili shkruan në “Facebook” se përpjekja për të penguar procesin zgjedhor me komisionerë, drejtohet kundër Bindjes Demokratike, e cila sipas tij duhet të ketë patjetër komisionerët e vetë në atë proces.

Patozi ndër të tjera nënvizon se Bindja Demokratike dënon me ashpërsi këtë provokim mbi procesin zgjedhor, dhe i kërkon KQZ-së që të veprojë shpejt dhe me drejtësi.

Statusi i plotë

“KQZ TË NDALË URGJENTISHT KËTË SULM PROVOKUES MBI PROCESIN ZGJEDHOR TË 30 QERSHORIT

Lajmi se Partia Demokratike dhe LSI-ja do të kërkojnë të përfaqësohen me komisionerë, por me jo me popull, në zgjedhjet e 30 Qershorit është provokimi më i fundit ndaj procesit zgjedhor. Zgjedhjet janë procesi i atyre, që marrin pjesë dhe administrohen sipas ligjit nga partitë e përfaqësuara në parlament. Partia Demokratike dhe LSI-ja nuk janë më të përfaqësuara, as në parlament dhe, as nuk marrin pjesë në zgjedhje me vullnetin e tyre. Përpjekja për të penguar procesin zgjedhor me komisionerë drejtohet pikë së pari kundër BINDJES DEMOKRATIKE, e cila duhet të ketë patjetër komisionerët e vet në atë proces. Së dyti, ajo drejtohet kundër procesit zgjedhor në tërësi, tek i cili me sa duket ata duan të fusin brenda Kalin e Trojës.

Shumica në pushtet dhe ish-opozita parlamentare mund të bëjnë pazare për pronat e shqiptarëve, për ndarje pushteti apo për çfarëdo gjëje tjetër, siç kanë bërë shpesh në të shkuarën, dhe shembulli më i qartë ishte marrëveshja e dy viteve të shkuara.

Ndoshta, jo rastësisht, nesër është përvjetori i 17 majit, ditë që, mesa duket, e ngroh shumë marrëdhënien Rama-Basha.
Por ata duhet ta dinë se nuk mund të bëjnë kurrë pazar për të administruar edhe votën e shqiptarëve për hallin e përbashkët të ruajtjes së këtij sistemi të kalbur politik.

BINDJA DEMOKRATIKE dënon me ashpërsi këtë provokim mbi procesin zgjedhor dhe i kërkon KQZ-së që të veprojë shpejt dhe me drejtësi për t’ua lënë zgjedhjet atyre që zgjedhin dhe zgjidhen dhe jo atyre që nuk duan të bëhen zgjedhje fare në Shqipëri.

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *

Kthehu
WhatsApp Denonco ne TT