Është shkarkuar nga detyra sekretari i këshillit bashkiak Durrës Armand Tragaj i cili u përfshi pak ditë më parë në një sherr me Luan Zazën, kryetar i PS-së Durrës. Shkarkimi i tij ishte përfshirë në rendin e ditës në mbledhjen e këshillit bashkiak Durrës, ndërsa në vend të tij u emërua Dorina Milaj.
Në fjalën e tij përpara këshilltarëve, Tragaj deklaroi se e ka zbatuar detyrën e tij në mënyrë korrekte. Propozimi për shkarkimin e tij u bë ditë më parë, gjë që më herët nxiti reagimin e ashpër të Tragajt i cili u përfshi në një konflikt me kreun e PS-së Durrës Luan Zaza në një lokal pranë Bashkisë së Durrësit. Juristi Tragaj u caktua në këtë post në vitin 2016-të dhe vinte nga radhët e LSI-së.
