Sikundër njoftoi një ditë më parë ministrja Manastirliu, Shqipëria do i shtohet listës së vendeve që do shtrëngojnë masat në prag të festave të fundvitit. Pas dy ditësh do të hyjë në fuqi edhe ora policore, akoma më e reduktuar se aktualja që kemi.
Nga 24 dhjetori deri më 4 janar, të gjithë duhet të futen në banesat e tyre para orës 20:30, ndryshe nga ora 22:00 që është aktualisht. Në të kundërtën do të përballen me gjobë. Më pas në 5 janar, do të rikthehet ora policore 22:00.
Ministrja e Shëndetësisë, Ogerta Manastirliu dha detajet mbi kufizimet e reja. “Shqipëria i shtohet listës së shteteve europiane që kanë marrë vendimin për të pezulluar fluturimet me Britaninë e Madhe, për shkak të shfaqjes së një varianti të Covid-19. Për ata qytetarë që do të vijnë nga Britania e Madhe me fluturimet që i kanë rezervuar brenda 22 dhjetorit, e kanë të detyrueshme të karantinohet për 14 ditë. Ndryshime do të ketë edhe në orën policore. Kështu që nga data 24 dhjetor deri më 4 janar qytetarët janë të detyruar që të futen në shtëpitë e tyre para orës 20:30, jo 22:00 siç është aktualisht, në të kundërtën do të gjobiten sipas Aktit Normativ që është aktualisht në fuqi. Më pas, në 5 janar do të rikthehet ora policore 22:00”, tha Manastirliu.
Ajo u shpreh se këto masa janë konsideruar nga Komiteti i Ekspertëve për të bërë sa më shumë kujdes nga infektimi. Si rrjedhojë e kufizimit të lëvizjes, ndryshimet e reja të orës policore do të vlejnë gjithashtu për baret dhe restorantet të cilat do të mbyllen në orën 20:30. Manastirliu u bëri thirrje gjithë qytetarëve që të shmangin daljet e panevojshme dhe aktivitetet jo thelbësore.