Një ditë më parë, kryedemokrati Basha paralajmëroi se nga shtatori do të rifillojnë sërish protestat, deri në largimin e Ramës. Sezoni veror duket se nuk ka qenë periudhë pushimi, pasi klasa politike është vënë në lëvizje.
Me gjasë, një tjetër forcë politike do ti shtohet aktualitetit shqiptar. Pas 70 partive, një grup i deputetëve të listës Basha, disa prej tyre sot në Kuvend, do të krijojnë një parti të re, të djathtë. Emri dhe logoja e partisë nuk janë bërë të ditura, por dihet vetëm se fokusi do të jetë forcimi i grupit të ri parlamentar.
Themeluesi i kësaj force politike, përflitet se do të jetë deputeti Myslim Murrizi, i cili në një komunikim për “Dosja.al”, nuk e përjashtoi këtë mundësi. Ai thotë se për momentin nuk dëshiron të jetë kryefjala e mediave, ndonëse nuk ka asgjë për të fshehur.
“Nuk dua të përbëj lajm në gusht, por s’kam asgjë për të fshehur”, tha Murrizi, duke e lënë të hapur mundësinë e krijimit të një partie. Bashkë me Murrizin do të jetë Halit Valteri, Alban Zeneli, Korab Lita, por edhe disa nga ata që hynë në Kuvend.
