Tërmeti shkatërrimtar la pasoja të mëdha në Thumanë dhe Durrës. Për sizmologun Rexhep Koçi, kjo periudhë nuk përfaqëson diçka që duhet të surprizojë opinion publik shqiptar. Sipas tij, qytetarët duhet të jenë të vetëdijshëm për situatën gjeologjike të vendit, dhe të marrin masat.
“Tashmë opinioni publik e di që Ballkani është zonë shumë aktive. Duhet të dijë që aktivitete të tilla do të ndodhin, edhe pse nuk e dimë kur. Prandaj ne duhet të tregojmë një kujdes shumë të madh, për sa i përket arkitekturës së ndërtimit. Dhe çdo godinë duhet të jetë në konform legjislacionit aktual”, thotë Koçi.
Eksperti shton më tej se tërmeti i 21 shtatorit, nuk shkarkoi të gjithë energjinë. “Tërmeti i 21 shtatorit nuk shkarkoi të gjithë energjinë. Ai kishte thellësi 29 km, kurse ai i djeshëm 59 km.
Kështu që aktivizimi i thyerjes që ka gjeneruar tërmetin, ka ndodhur më në thellësi. Pra nuk është i kondicionuar nga fakti që ka patur një tërmet më parë. Sepse gjithçka varet nga energjia e akumuluar në rajon”, shton ai. Duke pohuar për “A2”, që tërmeti i djeshëm ishte më i forti në 40 vjet, nga ai i vitit 1979.
