Kryesore

Para Kryeministrisë, nis sot maratona 10 ditore e protestave ndërkombëtare (VIDEO)

               Publikuar në : 16:57 - 06/07/19 S.N

10 ditë protesta kundër ndërtimit të hidrocentraleve. Që prej ditës së sotme e deri në 16 korrik në të gjithë Ballkanin priten të zhvillohen protesta mbi këtë çështje. Ndaj edhe këtë të shtunë dhjetëra qytetarë u mblodhën para Kryeministrisë, me pankarta në duar për të denoncuar dhe kërkuar ndalimin e shkatërrimit të lumenjve tanë.

“Kjo protestë organizohet në kuadër të një sërë protestash ndërkombëtare. Të cilat filluan sot, në datë 6 dhe përfundojnë në 16 korrik. Ka një organizim në të gjithë Ballkanin, pasi është një problem që na përfshin të gjithëve. Edhe ne këtu në Shqipëri do të vazhdojmë të mblidhemi e mbrojmë pasuritë tona. Jo vetëm në Tiranë, por në çdo fshat, mblidhen vendasit për problemet që i shqetësojnë. Do të organizohen protesta, peticione si edhe manifestime të mëdha.”

Në janar ministrja e Infrastrukturës dhe Energjisë Belinda Balluku bëri me dije se do të skanoheshin 182 kontrata koncesionare për 440 hidrocentrale private që janë dhënë në Shqipëri. Dhe në rast se do të gjendeshin shkelje, do të prisheshin kontratat. Por, për ambientalistët dhe qytetarët këto deklarata nuk janë vënë në zbatim.

“Deklaratat janë pozitive, problemi është sa zbatohen ato. Dhe ka dyshime të mëdha që procesi i skanimit të këtyre HEC-eve ka qenë korrekt. Si edhe i mjaftueshëm sipas nevojës që ka Shqipëria. Qeveria nuk e ka marr akoma seriozisht këtë çështje, e cila është në dëm të zhvillimit të qëndrueshëm të Shqipërisë. Është padyshim, një rrjet njerëzish të cilët përfitojnë nga kjo gjë. Dhe sigurisht janë të lidhur me politikën”, shprehet për Tirana Today ambientalisti Lavdosh Ferruni.

“Unë vij nga fshati Brataj në Vlorë, ku këta kanë parashikuar të bëjnë një HEC pranë një monumenti kulture shumë të bukur. Dhe shumë të lartë, një urë që është mbi 700-vjeçare. Rreth 100m mbi të kërkojnë të bëjnë një digë rreth 10m dhe pastaj me tuba të kalojnë përbri urës. Është firmosur nga ministritë përkatëse, por është ndaluar me pretendimin e të ashtuquajturit skanim. Vetë ky fenomen është një ndalje sa për të kaluar radhën, sepse mesa jemi informuar ne është miratuar gjithçka. Ndaj ne kemi vendosur të hapim një proces gjyqësor. Sipas ekspertëve tanë, një në fushën ligjore e një në të ndërtimit; me këtë projekt janë shkelur rreth 20 ligje të shtetit tonë.”

Protestuesit bëjnë thirrje për bashkim të sa më shumë qytetarëve. Pasi me ndërtimin e hidrocentraleve shumë njerëz rrezikojnë të humbin shtëpitë, tokat bujqësore, ujin e pijshëm, furnizimin me ujë për vaditje dhe natyrën e bukur.

“Kemi dalë që të mos prishet natyra, e duam të bukur Shqipërinë, ashtu siç na e ka dhënë Zoti. Qeveria duhet të reflektojë dhe të mbajë anën e popullit, jo të anën e atyre që duan të bëhen të pasur. Nuk ka ku të shkoj më keq, jemi ngopur dhe duam ta vjellim atë që kemi marr nga këta. Edhe pse është një vapë e tmerrshme, njerëzit kanë ardhur. Dhe unë pensioniste jam, e sëmurë e më bie dielli në kokë. Por, ia vlen të dalim. Sepse është për të mirën e të gjithëve, por ata që janë atje lartë nuk e kuptojnë. Iu intereson vetëm xhepi i tyre.”/ TIRANA TODAY

Kthehu
WhatsApp Denonco ne TT