Dhjetëra persona janë lënduar në avionin në fluturim të linjës ‘Turkish Airlines’, për shkak të turbulencave të forta. Në bord ndodhej edhe një shqiptar, Saed Nikaj, i cili ka publikuar pamjet e tmerrit që kanë përjetuar pasagjerët, disa prej tyre të gjakosur e të tmerruar. Ai tregon për mediat e huaja se për rreth 10-15 minuta gjendja ishte e tmerrshme, ku ka parë edhe gruan që ndodhej pranë tij të fluturonte nga sedilja e saj.
“Maskat e oksigjenit ranë nga tavani. Njerëzit nisën të bërtisnin”, raporton “The New York Times”.
“Falë Zotit dhe bekimeve tuaja që më bëtë pas incidentit në Podgoricë i shpëtova edhe një rrëmujë tjetër, por kësaj here lart në qiell”, shkruan shqiptari që u bë i njohur pak ditë më parë me simbolin e shqiponjës që bëri në aeroportin e Podgoricës, pak para zgjedhjeve në Tuz.
Aeroplani i “Turkish Airlines” u ul në mënyrë të sigurtë në aeroportin e Kennedy, por të paktën 30 vetë u dërguan në spital me lëndime jo të rrezikshme për shkak të turbullirave, thanë autoritetet. Në një deklaratë, kompania ajrore tha se ishte “thellësisht e pikëlluar nga kjo përvojë e pafat” dhe se po monitoronte nga afër gjendjen shëndetësore të udhëtarëve të lënduar. Aeroplani u ul në aeroportin e New York-ut në orën 5:35 të mëngjesit, pas largimit nga Stambolli.
