Autoritetet nigeriane kanë shkatërruar dy hotele në zonën jugore të Rivers, me arsyetimin se kanë thyer rregullat e izolimit duke i mbajtur ato të hapura në kohën e koronavirusit.
Guvernatori i vendit, Nyesom Wike, i cili ishte i pranishëm në momentin kur hotelet po shembeshin, tha se pronarët e hotelit nuk iu ishin bindur urdhrit të qeverisë për t’i mbyllur hotelet në këto kohë pandemie.
Ai tha se shumë nga njerëzit që kanë rezultuar pozitiv me koronavirus, janë gjetur në hotele të tilla në të gjithë vendin. Por ai nuk sqaroi nëse në hotelet që po shembeshin, po qëndronte ndonjë person që ka rezultuar i infektuar.
Ndërkohë të dy menaxherët e hoteleve janë arrestuar, por pronari i njërit prej tyre e ka mohuar faktin se hotelet kanë qenë operativë.
“Hotelet nuk po operonin dhe 70% e stafit ka qenë larguar. Në hotel ndodheshin vetëm 3 persona. Zyrtarët erdhën dhe na kërkuan ryshfet. Ata thanë se do na lënë të operojmë nëse do t’i jepnim para, por ne i thamë se nuk kemi punuar ndaj nuk kemi para t’ju japim”, tha Gogorobari Promise Needam për BBC.
Por qeveria e Rivers i mohon këto akuza. Rivers numëron 15 raste aktive dhe vetëm 2 viktima.
Ndërkohë, Nigeria ka më shumë se 4,300 raste të konfirmuara. Në shumë zona të Nigerisë, veçanërisht në Lagos janë marrë masa të rrepta kufizuese për frenimin e pandemisë.
