Ndonëse situata në Itali është mjaft e rëndë nga koronavirusi, vijojnë ardhjet nga zona e kuqe drejt Shqipërisë. Pak orë më parë, me vendim të qeverisë së drejtuar nga kryeministri Conte në Itali, në 14 provinca me 16 milionë qytetarë është ndaluar lëvizja, hyrja dhe dalja. Pavarësisht kësaj situate, nga zonat me rrezik të kuq në Itali nuk janë ndërprerë fluturimet drejt Shqipërisë. Aktualisht vijon normalisht lëvizja e njerëzve.
Në faqen zyrtare të aeroportit të Rinasit njoftohet për tre fluturime të anuluara me Italinë nga ‘Air Albania’, një në Romë, Milano dhe Bolonja. Por burime të sigurta për ‘Report Tv’ nga Autoriteti i Aviacionit Civil Shqiptar pohojnë se anulimi i këtyre tre fluturimeve nuk ka asnjë lidhje me koronavirusin. ‘Report Tv’ kontaktoi edhe me kompaninë ‘Air Albania’, që konfirmoi se “tre udhëtimet me Italinë janë anuluar për arsye operacionale, nuk kanë lidhje me koronavirusin”.
Kryeministri italian Giuseppe Conte nënshkroi një dekret, duke vendosur izolimin total të rajonit të Lombardisë, pasi kjo zonë ka numrin më të madh të të infektuarve.
Sipas këtij vendimi, qytetarët e kanë të ndaluar për të dalë nga rajoni, përveç rasteve emergjente.
Po ashtu, pjesë e këtij vendimi janë edhe Parma, Piacenza, Rimini, Reggio-Emilia, Modena, Pesaro dhe Urbino, Venecia, Padova, Treviso, Alessandria, Verbano-Cusio-OSSOLA, Novara, Vercelli dhe Asti, rajone këto që janë të banuara nga rreth 16 milionë banorë.
Ndërkohë, sipas autoriteteve vendase, javën e ardhshme do nënshkruhet një dekret që parashikon masa më drastike, ku çdo person që do të kapet duke hyrë apo duke dalë nga Lombardia, do të gjobitet me një shumë të majme.
Kjo gjendje do të zgjasë deri më 3 prill, dhe dekreti parashikon gjithashtu ndalimin e të gjitha ngjarjeve publike, mbylljen e kinemave, teatrot, palestrat, diskot dhe baret.
