Meta nuk ka pranuar të bëhet palë me asnjë sa i takon dhunës në protestën e 8 janarit. Duke analizuar situatën, presidenti i mëshon faktit se 8 janari nuk është një ngjarje e izoluar, por është një moment tragjik i një procesi politik degradues. Reflektuar konfliktit që ka lindur në Partinë Demokratike, Kreu i Shtetit shprehu haptazi shqetësimin për përshkallëzimin e konfliktit brenda partisë më të madhe opozitare. Në shenjë këmbane alarmi, presidenti thekson se zgjidhja nuk janë as mjetet fizike dhe policeske, por e gjithë situata mund të marrë fund vetëm përmes votës së lirë.
“Më duhet të sqaroj qëndrimin tim për këtë çështje. 8 janari në vlerësimin tim, nuk është një ngjarje e izoluar, por është një moment tragjik i një procesi politik degradues, që po zhvillohet prej muajsh në sytë e shqiptarëve. Thelbi është mungesa e ballafaqimit me votë të lirë. Jemi ende në kushtet kur institucionet janë minuar nga kapja e segmenteve shtetërore. Për të gjitha energjitë, duhet të mobilizoheshin për sistemin llogaridhënës.
Nuk dua të bëhem palë dhe nuk kam synuar të bëhem palë në konfliktin që ka lindur në PD, por si president jam i shqetësuar për përshkallëzimin e konfliktit brenda partisë më të madhe opozitare, që mund të ketë vetëm një zgjidhje, votën e lirë dhe respektimin shumicës, dhe garantimin e fraksioneve.
Përdorimi i forcës ndaj dyerve dhe dritareve, dhe ndaj protestuesve, nuk janë mjete për të marrë pushtetin.
Akuzat për infiltrimin e qëllimshëm të personave me precedentë kriminalë, janë alarmante. Është e papranueshme, që të mohohet çdo mekanizëm zgjidhje, duke nxitur forcën dhe revoltën. Kur të gjithë e kanë të qartë që përdorimi i dhunës nuk është mekanizëm për të marrë pushtetin, po kaq e dënueshme është përdorimi i dhunës dhe mbajtja e godinave. Mjetet fizike dhe politike dhe policeske, nuk kanë zgjidhje”, tha Meta.
