Ministrja e Shtetit për Marrëdhëniet me Parlamentin, Elisa Spiropali, ka ironizuar protestën nga Aleanca për Mbrojtjen e Teatrit. Po kështu, një thumbim ka lëshuar edhe për opozitën. Në fjalën e marrë në Kuvend, ajo tha se opozita i ka ikur betejave elektorale. Po kështu ironizoi edhe qëndrimin gjatë natës teksa ruanin Teatrin, duke thënë se Monika Kryemadhi dhe Lulzim Basha nuk ditën të mbanin dezhurnin.
“Opozita i ka ikur betejave elektorale. Ikën në 2017, në 2019, tani ikën nga tryeza se u prish Teatri Kombëtar. Ajo që ndodhi ishte që nga një protestë me ndjeshmëri të vërtetë qytetare, ata e kanë kthyer në një skenë ku Monika luan rolin e Penelopës, Basha të Odiseut, dezhurnin nuk dinë ta mbajnë, trupat e tyre nuk janë nën rrënoja.
Meqë këto vijat nuk dinë si t’i mbajnë, kanë vendosur të braktisin një nga reformat më të rëndësishme. Ja teatri absurd që po merremi ne. Nuk kanë asnjë lidhje me artistët e mëdhenj, ato janë për një Teatër të ri. Ata s’kanë kulturë, po s’dinë ku të lidhin gomarin. Ajo protesta makbethiane e kafshimit të veshit”, tha Spiropali.
