Ambasadorja e SHBA-së në Tiranë, Yuri Kim është takuar sot me Drejtorin e Përgjithshëm të Policisë së Shtetit, Gledis Nano. Ky është takimi i parë zyrtar ndërmjet ambasadores së SHBA-së dhe kryepolicit Nano, i cili mori detyrën më 7 tetor. Pas takimit, Gledis Nano tha në një prononcim për mediat se lufta ndaj krimit e korrupsionit nuk mund të bëhet asnjëherë vetëm, dhe se bashkë do ia dalin për të pasur më shumë siguri e rend në vend.
“Sapo zhvilluam një takim me znj ambasadore. Takimi u krye në kuadër të bashkëpunimit që Policia e Shtetit ka me të gjitha agjencitë ligjzbatuese të SHBA-ve. Siç dihet, SHBA-të janë partneri ynë strategjik dhe kemi mbështetjen kryesore të Policisë së Shtetit për trajnimet, logjistikën, konsulencën. Kështu që e vlerësoj shumë këtë bashkëpunim dhe këtë mbështetje. Dhe e sigurova znj. ambasadore që Policia e Shtetit do jetë në nivelet më të larta të performancës, për të luftuar krimin dhe korrupsionin. Kërkova dhe mbështetje që agjencitë ligjzbatuese mund të japin për Policinë e Shtetit. Kjo është një luftë që nuk mund të bëhet asnjëherë vetëm, dhe duke marrë parasysh mbështetjen deri tani, jam i bindur që bashkë do ia dalim për të pasur më shumë rend dhe siguri në vendin tonë”.
Me një përvojë prej 17 vitesh në Policinë e Shtetit, 40-vjeçari me origjinë nga Skrapari është në majë të piramidës së uniformave blu. Që prej kohës kur u emërua në krye të Antiterrorit, kredencialet e Gledis Nanos janë rritur.
