Një tërmet i fortë me magnitudë 6.4 goditi pjesën veriperëndimore të Shqipërisë, në orën 3:54 të mëngjesit të 26 nëntorit 2019.
Dy muaj më parë, vendi ishte goditur nga një tërmet me magnitudë 5.8. Disa nga godinat që kishin pësuar dëmtime në shtator, u shembën nga lëkundja e fortë 55-sekondëshe e nëntorit.
51 njerëz vdiqën, dhe mbi 3.000 të tjerë u plagosën. Mijëra banesa u shpallën të pabanueshme në Durrës, Tiranë, Fushë-Krujë, Laç dhe Lezhë.
Tragjedia solli solidaritetin e vendeve fqinje, që sollën me shpejtësi ekipet e tyre të shpëtimit. Qindra mijëra emigrantë shqiptarë, ofruan ndihmën e tyre monetare kryesisht tek fondacionet bamirëse, sikurse është “Fundjavë Ndryshe”.
Falë atyre fondeve, deri tani janë ndërtuar dhjetëra banesa, dhe të tjera po ndërtohen. Qeveria organizoi me sukses një konferencë ndërkombëtare donatorësh, që mblodhi mbi 1.2 miliardë euro grante dhe hua.
Por pandemia e Covid-19, e ka vonuar jo pak punën për rindërtimin e shtëpive të mijëra familjeve të prekura nga kjo tragjedi.
TIRANA TODAY
