Fushata elektorale e këtij viti, përkon me një situatë politike të pazakontë. PS çeli dje zyrtarisht fushatën, duke u shprehur e vendosur të mbajë zgjedhjet në afatin e dekretuar nga presidenti. PD dhe LSI, konfirmojnë bojkotin e procesit, dhe vazhdojnë agjendën e protestave. Evropa është e zënë me punët e veta.
Ajo këmbëngul, se krizën duhet ta zgjidhin mes tyre partitë politike shqiptare. Opozita ka kërcënuar se në kushtet kur zëri i saj nuk po dëgjohet, protestat mund të ri-prodhojnë akte dhune.
Dhe ato do të pamundësojnë mbajtjen e zgjedhjeve më 30 qershor. Rama ndihet i inkurajuar nga vendimi i KE, për hapjen pa kushte të negociatave të anëtarësimit. Edhe pse miratimi në qershor apo edhe shtator mbetet i vështirë, për shkak të kundërshtimit të së paku 3 vendeve anëtare. Kancelaritë perëndimore, e kanë paralajmëruar me tone të forta Bashën dhe Berishën për pasoja personale, në rastin e destabilizimit të Shqipërisë. Ato tani po testojnë, se deri ku është e gatshme të mbërrijë PD-ja. Nëse është apo jo e gatshme që t’i vërë flakën vendit, vetëm për të afruar kohën e rotacionit politik.
Nëse situata përshkallëzohet me shpejtësi, ndërkombëtarët mund të ndërhyjnë me urgjencë për uljen e palëve në tryezë, dhe shtyrjen më së pari të zgjedhjeve lokale. Por deri atëherë, në Tiranë dhe jo vetëm, mund të konsumohen episode dramatike, që mund të na lënë gjatë në paradhomën e Evropës.
TIRANA TODAY
