Avokati Spartak Ngjela, në analizën e radhës ka folur me emra ndërsa ka zbulon 3 ‘kokat’ që do të fundosen nga SHBA-ja. Ngjela shprehet se ish-kryeministri Sali Berisha, presidenti Ilir Meta dhe kreu i PD-së Lulzim Basha, kanë muaj që bëjnë thirrje për shkatërrim. Nga ana tjetër qëndron edhe Rama, ku për avokatin ka dyshime se e donte Shqipërinë e djegur, e ditët e fundit ka ndryshuar strategji.
Ai shton më tej se policia në dy ditët e fundit, ka qenë në nivel të lartë profesional. Avokati është i mendimit se suksesi i policisë shqiptare, në funksion të politikës amerikane dhe BE-së, është në favor të qeverisë Rama.
Avokati i njohur e shikon protestën në Tiranë, si rrugë e shpëtimit për korrupsionin e lartë shtetëror. Sipas Ngjelës, Berisha, Meta dhe Basha ka muaj që bëjnë thirrje për shkatërrim, pasi janë të tmerruar nga SPAK. Ai shkruan se këta janë të kapur nga ekspertiza perëndimore, por edhe nga Shërbimi Informativ i shtetit shqiptar.
Statusi
Dy janë forcat e rëndësishme sot në Shqipëri, kundër korrupsionit të lartë shtetëror: SPAK dhe Policia e Shtetit.
SPAK-u për vijimin e reformës antikorrupsion, dhe Policia e Shtetit kundër forcave shkatërruese që kanë dalë këto ditë.
l.
Korrupsioni i lartë shtetëror nuk po e gjente dot një rast për të filluar shkatërrimin masiv të Shqipërisë. Vrasja e një qytetari nga policia, iu duk se rasti u erdhi.
Pse, e do këtë shkatërrim korrupsioni i lartë shtetëror?
Berisha, Meta dhe Basha ka muaj që bëjnë thirrje për shkatërrim, dhe kjo është e provuar botërisht. Po Rama? Edhe Rama, deri dje, ka dyshime se e donte këtë gjendje, përderisa e la pasive policinë në dy ditët e para, kundër hordhive djegëse të Tiranës. Gjithsesi, tani nuk mund të kemi më vërejtje ndaj tij, se policia, në dy ditët e fundit, ka qenë në nivel të lartë profesional. Suksesi i policisë shqiptare, që erdhi në një mënyrë kaq të shpejtë dhe efikase, në funksion te politikes amerikane dhe Bashkimit Evropian, është në favor të qeverisë Rama. Por, a e di Rama këtë. Edhe në s’e di, ka për ta dëgjuar.
Il.
Po, pse është i lidhur kriminalisht, Korrupsioni i lartë shtetëror, me hordhitë që duan të shkatërrojnë Shqipërinë?
Lidhja e tyre vjen nga frika kundrejt SPAK-ut, frikë kjo që i ka mbërthyer psikikisht të gjithë krerët e korrupsionit shtetëror shqiptar, sepse janë të kapur në grabitjen që i kanë bërë shtetit shqiptar dhe shqiptarëve, në mbi 20 vjet rresht.
Por, me këtë që nisën të bënin, për shkatërrimin e Shqipërisë, janë treguar mëndjelehtë, se tani janë të kapur nga ekspertiza perëndimore, por edhe nga Shërbimi Informativ i Shtetit shqiptar, për të gjitha paratë që iu kanë paguar forcave shkatërruese, madje edhe fëmijëve romë, të cilët i kanë lëshuar drejt rrezikut të tyre maksimal. Pse, ju mendoni se, pa ua nxjerrë këto prova, i ka kërcënuar ambasadorja amerikane Yuri Kim, para dy ditësh, krerët e korrupsionit shqiptar?!
Këta mendjelehtë qe duan të shpëtojnë gjënë e vjedhur duke shkatërruar Shqipërinë, sot, kanë dështuar plotësisht, sepse forca e policisë i ka në dorë dhe bën si të dojë me ta.
Në të njëjtën kohë, pyetja që ngrihet këtu, brenda provave që kanë shërbimet perëndimore në Shqipëri, dhe SHISH gjithashtu, është kjo: SPAK-u, a do të fillojë proceset penale kudër tyre?
Sigurisht që duhet t’i fillojë proceset penale, por, paraprakisht, është në dobi të shoqërisë shqiptare që, provat dhe faktet e mbledhura, duhet t’ia bëjnë të njohura edhe opinionit publik shqiptar.
