Kreu i Partisë Demokratike, Lulzim Basha, ka zhvilluar ditën e sotme një takim me ministrin e Jashtëm të Austrisë, Alexander Schallenberg.
Në një prononcim për gazetarët në përfundim të mbledhjes, Basha foli për procesin e hapjes së negociatave për Shqipërinë me BE, teksa theksoi se pengesa kryesore në këtë drejtim mbetet kryeministri Edi Rama.
Kryetari i opozitës tha se Rama po tregon se nuk ka vullnet për tejkalimin e këtij ngërçi politik.
“Falënderova ministrin për mbështetjen e procesit për hapjen e negociatave me BE. E garantova se PD do të bëjë çdo gjë për të kaluar krizën politike. Edi Rama po tregon se është pengesa e vetme për të tejkaluar këtë krizë dhe për të zgjidhur këtë situatë që po na mban peng. Ne jemi vendosur të bëjmë gjithçka që Shqipëria mos të mbetet e kapur nga korrupsioni. Duhet të ecim përpara me qartësi me vizion, të shkatërrojmë lidhjen e krimit me politikën, duke nxjerrë paratë nga xhepat e oligarkëve dhe kthimin e tyre aty nga janë vjedhur, nga xhepat e shqiptarëve”, deklaroi Basha.
