Që pas përjashtimit nga grupi parlamentar i PD-së i ish-kryeministrit Sali Berisha, situata mes demokratëve është e tensionuar. Së fundmi janë përplasur me njëri-tjetrin aktivistja Evi Kokalari që i është bashkuar Berishës, me deputetin e PD-së Ervin Salianji, i cili është përkrah Lulzim Bashës.
Pas ironizimit të deputetit Ervin Salianji, duke thënë se nuk e njihte aktivisten e Partisë Demokratike Evi Kokalarin, sot reagoi edhe kjo e fundit. Kokalari thumboi Salianjin, teksa i tha se nëse do rrinte me burra si Berisha dhe jo me Grida Dumën, do kishte arritur ta njihte.
“O Salianj më raftë pika sa i voçkël je. Po të kishe ndenjur me burra si Sali Berisha dhe jo mbas fustanit të Gridës, do e kishe mësuar kush është Evi Kokalari. Pi pak qumësht tashti”, shkruajti ajo.
Për statusin e Evi Kokalarit, Salianji u pyet sot në emisonin “Breaking”. Ai tha se nuk iu përgjigjet njerëzve që marrin mikrofonin për të folur, se sipas tij, janë persona që kanë mllef ndaj kujtdo.
“Unë nuk i përgjigjem qytetarëve që marrin mikrofonin në këto takime, edhe në komente kur shkruajnë. Njerëz që nuk përfaqësojnë asgjë, që boshësia e tyre bëjnë që të kenë mllef me çdo personazh. Edhe ajo ashtu është”, tha Salianji.
