Në një konferencë të përbashkët me kryeministrin Edi Rama, Ministrja e Arsimit, Evis Kushi i cilësoi mësuesit si heronjtë e ditës. Në fjalën e marrë, ajo tha se ky sektor ka pësuar përmirësime, ndonëse ende ka shumë për t’u bërë në këtë drejtim. Ajo solli në fokus rastet abuzive, kur deputetët apo zyrtarët ndërhynin për të punësuar mësues. E ndërsa tashmë gjërat kanë ndryshuar, pasi kalojnë përmes një procesi transparent siç është portali “Mësues për Shqipërinë”.
“Dua ta nis këtë prezantim me disa nga raportet ndërkombëtare për vlerësimin e arsimit. Do ndalem tek një raport i Bankës Botërore, qe e vlerëson Shqipërinë si një ndër 10 vendet me përmirësim në arsim.
Shqipëria në vitet e fundit ka pasur rritje në arsim. Jemi të ndërgjegjshëm që kemi ende punë për të bërë. Por jemi në rrugën e duhur. Është me rëndësi, pasi këto raporte janë jo vetëm inkurajuese, por dhe sfiduese.
Në buxhetin e 2021, për sektorin e arsimit ne i përmbahemi objektivave që kemi vendosur. Rritja e pagave është një nga lajmet më të mira që sjell ky buxhet. Mësuesit, pas mjekëve dhe infermierëve, janë heronjtë e ditës. Ata po punojnë me përkushtim. Nuk ka më raste kur ndërhynin deputetët apo jepej lekë për vendin e punës”, tha ministrja Kushi.
Ministrja e Arsimit ka bërë me dije se paga e mësuesve, nga 1 janari i vitit 2021 do të rritet me 15%. Kushi foli edhe për përfitimin e librave falas, ku sqaroi se vitin e ardhshëm edhe nxënësit e klasave të gjashta dhe të shtata, do të përfitojnë nga kjo skemë.
“Në vitin 2021, paga e mësuesve do të rritet me 15%. 75.8 miliardë lekë është buxheti për arsimin në vitin 2021.
250 mijë nxënës do të përfitojnë nga skema për libra falas. Këtë vit do të ketë libra falas edhe për klasat e gjashta dhe të shtata.
Qëllimi ynë është që të kemi më shumë mësuesë ndihmës. Sot është e pamundur që një mësues të punësohet nga partitë, kjo nuk ndodh, punësimi vjen vetëm nga portali”.
