Çdo ditë e më shumë po shtohen masat kufizuese në vend si pasojë e përhapjes së koronavirusit vdekjeprurës.
Pak më herët Rama njoftoi se duke filluar nga ora 18:00 e ditës së sotme do të ndalohet edhe lëvizja e këmbësorëve.
Në lidhje me këtë vendim ka reaguar edhe ish-deputeti i PD-së, Edi Paloka. Përmes një postimi në Facebook, Paloka thotë se Rama shqetësohet vetëm që të mos prekë lekët e oligarkëve të vet.
Ai shton me ironi se kreu i qeverisë lejon grumbullimet e mëdha në qendrat e punës, por gjobit njerëzit që dalin në rrugë.
Postimi i plotë:
Kryeministër qesharak dhe i rrezikshëm! Deri në orën 18.00 lejon lëvizjen e njerëzve, lëvizjen e makinave, grumbullimet masive ne qendrat e punës (fasoneri dhe call centers), shëtitjet në rrugë, por pas orës 18.00, qytetarët nuk lejohen të dalin në këmbë. Dalje paradite dhe karantinë pasdite është një tallje e dhimbshme me jetën e shqiptarëve, për faktin e vetëm se Edi Rama nuk do që të prekë lekët e oligarkëve të vet.
Koronavirusi nuk luftohet vetëm me policë dhe me gjoba ndaj qytetarëve. Karantina nuk funksionon part time. Dikush duhet ti thotë në bunkerin ku është izoluar se virusi nuk infekton part time. Zgjidhja është karantinë e plotë, fillimisht për të paktën 14 ditë, rimbursim i bizneseve, rimbursim i pagave, ushqime për të moshuarit dhe më të varfrit.
