Në Kosovë po bëhet nami me grabitjet. Disa persona të armatosur plagosën një ditë më parë një polic. Fatmirësisht ai është jashtë rrezikut për jetën. Një polic u plagos me armë zjarri nga disa persona që po tentonin të grabisnin paratë nga një bankomat në Prishtinë. E njëjta situatë është përsëritur sërish. Policia e Kosovës bën të ditur se brenda pak minutave kanë ndodhur dy grabitje të institucioneve financiare.
“Rreth orës 10:40 është raportuar për një grabitje të ndodhur në filialin e një institucioni financiar për transferta ndërkombëtare, në kryqëzimin e rrugën ‘Bill Klinton’ në Prishtinë. Policia ka dalë në vendngjarje, dhe nga informacionet e para dyshohet që grabitja të jetë kryer nga një person”, ka thënë zëdhënësja e Policisë së Kosovës, Flora Ahmeti.
Një grabitje tjetër në kryeqytet ka ndodhur në kryqëzimin e rrugëve “Edmond Hoxha” dhe “Hajrullah Abdullahu”. “Rreth orës 10:30 është raportuar për një grabitje të ndodhur në filialin e një institucioni financiar për transferta ndërkombëtare në kryqëzimin e rrugëve “Edmond Hoxha” dhe “Hajrullah Abdullahu” në Prishtinë.
Pas marrjes së informacionit, policia ka dalë në vendngjarje dhe bazuar në informacionet e para dyshohet që grabitja të jetë kryer nga një person i cili po ashtu dyshohet të ketë qenë i armatosur. Policia ka iniciuar një hetim lidhur me rastin, dhe ka nisur me ndërmarrjen e veprimeve të nevojshme policore me qëllim zbardhjen e rastit”, ka deklaruar zëdhënësi i policisë, Agron Borovci.
