Deputeti demokrat Xhelal Mziu ka shuar zërat lidhur me mos pjesëmarrjen e tij në “Foltoren” e Berishës. Ai e justifikoi mosprezencën me arsyet personale, dhe aspak imponim nga ana e kryedemokratit Basha.
Teksa ishte i ftuar ditën e djeshme në një studio televizive, deputeti Mziu bëri me dije se nuk ka marrë asnjë urdhër nga Lulzim Basha, për të mos marrë pjesë në “Foltoren” e Berishës, por ka qenë vendim i tij personal për të shmangur ndarjen në kampe të demokratëve. I pyetur se a e ka prerë në besë Berishën, Mziu tha se ish-kryeministri ka kontribute të jashtëzakonshme, dhe se vendimi i tij i shërbente PD-së.
“As nuk jam orientuar nga partia, dhe as nuk jam qortuar. Është bindje e imja e brendshme. Në disa takime që kemi bërë, ne kemi thënë që në këto kushte duhet të përdorim autoritetin tonë, për të mos krijuar kampe. Ne na intereson që PD-ja të dalë nga kjo situatë më e madhe se sot.
Unë kam qenë aktor kryesor në 8 vitet e qeverisjes së PD-së. Berisha ngelet person i pazëvendësueshëm. Nuk e heq konsideratën personale që kam për Berishën”, deklaroi ai.
Më tej, deputeti demokrat Xhelal Mziu theksoi se ai nuk e tradhton PD-në, prandaj nuk mori pjesë në “Foltore”, pasi aty ishte vetëm një pjesë e kësaj force. “Unë jam një person që përballem dhe asnjëherë nuk tërhiqem. Mosprania ime nuk ka të bëjë me atë që ju thatë. Në këtë raund të liderit historik të PD-së që ka ndërmarrë në Shqipëri, është një pjesë e PD-së. Unë nuk tradhtoj Partinë Demokratike. Unë gjykoj që pjesa përfaqësuese e PD-së, nuk duhet në këto momente të nxisë konflikte të brendshme që mund të kthehen në bumerang. Unë nuk kam shkuar atje sepse jam i bindur. Nëse bëhen foltore të tjera, unë nuk do të marr pjesë, për të mos renditur në kampe të ndryshme”, u shpreh Mziu.
