Presidenti Serb Aleksandar Vuçiç u tregua mjaft i drejtpërdrejtë ndaj atyre që nuk marrin pjesë në nismën “Open Balkan”, duke u shprehur se nuk ka pse ti kërkojnë falje atyre shteteve që nuk marrin pjesë, pasi faji sipas tij, nuk është i Serbisë, Maqedonisë së Veriut apo dhe Shqipërisë.
Ndonëse nuk i përmendi shtetet konkrete, Vuçiç dha sinjalet drejt Kosovës, që është më e ashpra në argumentet e paraqitura në refuzimin e nismës, duke e cilësuar si një favorizim të Beogradit. Veç Kosovës, jashtë kësaj nismeje janë Mali i Zi dhe Bosnje-Hercegovina. Vuçiç sqaroi se nëpërmjet nismës së “Open Balkan” do të zgjerohet tregu i punës për të tre vendet pjesëmarrëse në këtë iniciativë. Në vija të përgjithshme, ai sqaroi se kjo është një nismë gjithëpërfshirëse.
“Për lejet e punës, psh fabrika që ne kemi dhe në Maqedoninë e Veriut, kishin nevojë për inxhinierë që të bënin disa trajnime me punëtorët tanë atje. Dhe ishte shumë e vështirë të nxirreshin lejet e punës, ndërsa tani ne nuk do na duhet të bëjmë asgjë, sepse ata janë të mirëpritur në Serbi sikurse edhe punonjësit tanë në Maqedoni.
Ne do ta zgjerojmë tregun e punës, do tërheqim më shumë biznese nga perëndimi apo lindje, pasi do u ofrojmë atyre një krah pune dhe njerëzit tanë mund të lëvizin aty ku është puna. Kjo është e rëndësishme edhe sa i përket thithjes së investimeve, dhe kjo është baza e një zhvillimi më të mirë ekonomik të të tre vendeve tonë në të ardhmen. Biznesi për kompanitë e përfshira, do të bëhet më e lehtë, tregtia do të jetë më e lehtë.
Ne të tre sëbashku, ose të gjithë sëbashku do të duhet të diskutojmë hapat e mëtejshëm, pasi njerëzit duan të shohin rezultate dhe duhet t’i bëjmë gjërat më shpejt. Në muajt në vijim, ne duhet të organizohemi në mënyrë që në sezonin e verës të shohim që qytetarët e vendeve tona të kenë 5% ulje në dyqane, hotele apo restorante të ndryshme dhe besoj se kjo mund të subvencionohet nga shteti.
Ky është një proces gjithëpërfshirës, dhe ne e kemi bërë të qartë. Më ka ardhur në majë të hundës që duhet të japim justifikime për hiç gjë, a thua se kemi bërë një gjë të gabuar ndaj atyre që nuk janë bërë pjesë e kësaj iniciative. Ne nuk kemi pse i kërkojmë ndjesë atyre që nuk duan të bëhen pjesë. Por do të jetë e vështirë për ata që t’u shpjegojnë qytetarëve të tyre, se përse nuk janë pjesë e kësaj iniciative”, tha ai.
