Presidenti iranian, Hassan Rouhani, ka habitur me deklaratën e bërë së fundmi se Irani mund të ketë 25 milionë persona të infektuar nga koronavirusi.
Deklarata e tij bazohej në një hulumtim të Ministrisë së Shëndetësisë, e cila kishte arritur në këto dyshime.
Gjatë një samiti për koronavirusin, Rouhani tha se 30 deri 35 milionë të tjerë mund të infektohen gjatë javëve apo muajve të ardhshëm. Ai shtoi se numri i të shtrirëve në spitale mund të rritet gjatë kësaj periudhe, ndonëse nuk shpjegoi pse.
Shifrat zyrtare të raportuara deri më tani nga Irani flasin për rreth 270 mijë të infektuar dhe rreth 14 mijë viktima.
Irani vendosi masa kufizuese që në muajin mars, por filloi t’i lehtësonte ato rreth dy muaj më vonë për shkak të nevojës për riaktivizim të ekonomisë.
Vlerësohet se së paku dy milionë iranianë kanë mbetur pa punë, si rezultat i pandemisë dhe sanksioneve të vazhdueshme amerikane. Irani është vendi më i prekur nga koronavirusi në Lindjen e Mesme.
