‘Vaksina është e vetmja që mund të shkurtojë zgjatjen e pandemisë’. Është ky opinioni i mjekut imunolog, Genc Sulçebe, i cili tha në një lidhje live për rubrikën ”Opinion” në News24 se masat duhen zbatuar.
Ai zbuloi ndër të tjera se në rastin më të mirë, vaksina nuk mund të vijë para muajve shkurt-mars. Ndaj të vetmet rrugë për të mos u infektuar janë distancimi fizik, maskat dhe higjiena personale.
Qeveria shqiptare ka dërguar në Kuvend marrëveshjen për blerjen e vaksinës kundër COVID-19, disa muaj pas nënshkrimit të marrëveshjes me kompaninë Covax, për të siguruar dozat për popullsinë.
Ende shqiptarët kanë pikëpyetjet e veta për vaksinën. Çfarë këshillash keni, a duhet bërë?
Është një fakt i njohur, që vaksinat kanë bërë epokë në shëndetin publik. Janë bërë që 200 vjet më parë, që realizohen nga moshat e reja. Kanë zgjatur jetëgjatësinë e njeriut. Edhe vaksina ndaj COVID-19 është e domosdoshme për të ndërprerë pandeminë. S’ka rrugë tjetët, dhe për t’u arritur imuniteti kolektiv. S’mund të presim të infektohet gjysma e popullatës shqiptare, që popullata jonë të krijojë imunitet. E vetmja rrugë për imunitetin kolektiv që të ndërpritet epidemia, dhe të dalim nga kjo gjendje. Ka jo vetëm teori, por hipoteza pseudoshkencore dhe hidhen për të frikësuar dhe për të reaguar në mënyrë jo adekuate. Vaksina është e vetmja që mund të shkurtojë zgjatjen e pandemisë.
A është efektive maska?
Duhet të kemi parasysh një fakt, që deri tek vaksina do jetë një periudhë shumë e vështirë. Në rastin më të mirë, vaksina s’mund të vijë para muajit shkurt-mars, shpresoj që të vijë më parë. S’kemi rrugë tjetër, vetëm duke u mbrojtur me masat, si distancimi fizik. Si dhe maska. Këto të dyja duhet të aplikohen së bashku.
S’mund të mbajmë maskë dhe të rrimë ngjitur, apo e kundërta. Si dhe s’duhet prekur fytyra me duar jo të dezinfektuara. Njerëzit e dytë, të tretë duhet të shihen si të dyshimtë. Sa i përket maskave, ajo kirurgjikale është e lehtë dhe efektive, por duhet ndryshuar çdo 4-5 orë ose 6 orë. Kurse ajo tekstile përdoret më gjatë, por duhet larë çdo ditë.
