Një vit më parë, Miss Serbia bëri shqiponjën. Kaq mjaftoi që të shpërthente rrjeti, e të kishte pakënaqësi nga serbët. Konkursi i bukurisë “Miss Freedom of the World” i cili u mbajt një vit më parë në Kosovë, ‘pushtoi’ faqet e para të mediave të huaja. Miss Serbia, Irina Jovanka mori vemendjen për shkak të një gjesti të veçantë.
Bukuroshja serbe bëri me duar simbolin e shqiponjës dykrenare gjatë sfilatës. Duke mos u mjaftuar me aq, ajo bëri të njëjtën gjë edhe më pas gjatë intervistës.
Kjo situatë është rikthyer sërish në fokus, edhe për të mësuar më shumë nga prapaskenat.
I ftuar në emisionin “Ditë e Re”, producenti i këtij kompeticioni Shpejtim Zejneli, foli mbi reagimet e ashpra nga mediat serbe, dhe vetë presidentit Vuçiç kundrejt tij.
Zejneli u shpreh se ky gjest u bë me dëshirën e saj, dhe në asnjë moment ai apo dhe stafi nuk ia imponuan një gjë të tillë. Më tej ai shtoi se për këtë çështje tejet sensitive, është shpallur person non grata nga Vuçiç.
“Vjet Missi i Serbisë e bëri shqiponjën, mediat e masakruan. Ishte kompeticioni im ai i cili u bombardua, madje u shpalla nga presidenti Vuçiç person non grata ( person i padëshiruar). Ne nuk e detyruam, ajo me dëshirën e saj e bëri. Ajo përfitoi nënshtetësi austriake, përfitoi shtëpi dhe makinë nga shqiptarët”, rrëfeu ai.
