Në ceremoninë e dorëzimit të detyrës së ministres së Jashtme Olta Xhaçkës, kryeministri Edi Rama thënë se Gent Cakaj e ka kryer detyrën në kushtet e një ngërçi, duke iu referuar kështu refuzimit të presidentit Ilir Meta për ta dekretuar. Këtë Rama e ka quajtur një ngërç absurd.
Në një deklaratë të përbashkët për shtyp, Rama tha se me eksperiencën që ka, Xhaçka është në lartësinë e duhur për të marrë këtë stafetë. Ai shtoi se Xhaçka do të jetë drejtuesja e parë në Ministrinë e Jashtme, që do të këshillohet nga vetë kryeministri dhe ish-ministri në detyrë, Gent Cakaj.
“Më vjen shumë mirë që stafeta sot i kalon Oltës, e cila ka një eksperiencë jo të vogël. Është në lartësinë e duhur për ta marrë këtë stafetë.
Ky institucion, si në çdo hapësirë tjetër të jetës së organizuar institucionale apo shoqërore, ka patjetër nevojë për të çuar jo vetëm përpara punën dhe marrëdhëniet me të tjerët, por edhe transformimin e vet të brendshëm për të qenë në lartësinë e kohës.
Gent shumë faleminderit, ne do vazhdojmë rrugën së bashku, pavarësisht ndryshimit të pozicioneve dhe ti në mënyrë të përditshme, unë pak më të distancuar, do jemi një mbështetje e posaçme për Oltën, që do të jetë drejtuesi i parë në Ministrinë e Jashtme që do ketë mundësinë të jetë e këshilluar nga një dyshe si unë dhe Genti”.
