Ministri i Jashtëm turk, Mevlüt Çavuşoğlu ka bërë me dije se ndërtimi i 500 shtëpive të premtuara nga Turqia, për familjet e prekura nga tërmeti do të fillojë në fund të shkurtit.
Ai u shpreh se Turqia do të marrë pjesë në mbledhjen e donatorëve, teksa thekson se do të nxisë edhe vendet pjesëmarrëse që të rrisin kontributin e tyre.
“Turqia do të marrë pjesë në mbledhjen e donatorëve dhe do të nxisë vendet pjesëmarrëse për rritjen e kontributeve të tyre për të ndihmuar Shqipërinë në përballimin e rindërtimit. Ndërtimi prej Turqisë i 500 njësive të banimit për familjet e pastreha prej tërmetit të 26 nëntorit do të fillojë në fund të muajit shkurt. Përpjekjet dhe kontributi ynë për njohjen dhe rritjen e rolit të Kosovës në organizatat ndërkombëtare do të rriten”, tha ai gjatë vizitës së sotme në Tiranë.
