Presidenti Meta vijoi edhe sot me publikimin e dokumenteve të reja. Ai tha që në krye të fjalës se dje shqiptarët dhe partnerët ndërkombëtarë u njohën me faktet e pakundërshtueshme, ndërsa akuzoi Ministren e Drejtësisë Eilda Gjonaj, se ka shkelur ligjin.
Kreu i Shtetit Ilir Meta ka hedhur akuza të drejtpërdrejta ndaj ministres së Drejtësisë, Etilda Gjonaj. Meta në një deklaratë për mediat, ka bërë me dije se në atë që ai e quan ‘grushti i shtetit’, është përfshirë dhe Etilda Gjonaj.
Ai tha se Gjonaj ka urdhëruar vartësit e saj për publikimin e vendimit në Fletoren Zyrtare, dhe të gjitha provat do shkojnë në SPAK.
“Provat do ia dorëzojmë SPAK, ku rezulton se është përfshirë drejtpërdrejtë Etilda Gjonaj, por dhe funksionarë të lartë të këtij institucioni, në varësi të saj, në llogari të skenarit mafioz të kapjes së Gjykatës Kushtetuese.
Gjonaj ka urdhëruar Sekretarin e Përgjithshëm të dërgonte për botim në Fletoren Zyrtare një vendim, që duhet botuar vetëm në faqen e Gjykatës Kushtetuese. Ministrja nuk ka asnjë rol të dërgojë aktet e KED për botim.
Ka urdhëruar botimin pa ia kërkuar askush. Ministrja ka shpërdoruar detyrën, falsifikim dhe ndërhyrje e paligjshme në proces. Brenda ditës së hënë do depozitoj pranë SPAK kallëzimin penal ndaj ministres Etilda Gjonaj dhe jo vetëm”, u shpreh Meta.
