Ish-deputetja Jorida Tabaku duke përshëndetur aktin e Presidentit të Republikës për kthimin mbrapsht në Kuvend dhe mos dekretimin e Ligjit të Korporatës së Investimeve, numëron faktet se përse ky ligj është projekt kriminal në kurriz të shqiptarëve.
Reagimi i plotë i Tabakut:
“Gjatë vitit të fundit Partia Demokratike ka zhvilluar një betejë me fakte, të dhëna dhe argumente se pse Korporata e Investimeve është një projekt antikushtetues dhe grabitqar.
Në betejën tonë nuk kemi qenë vetëm.
Institucionet ndërkombëtare duke nisur nga BB, FMN dhe BE kanë reaguar duke kërkuar që ky ligj të mos miratohet sepse është në dëm të interesit publik dhe mbledh fuqi në duar të një individi.
Sot dhe Presidenti i Republikës reagoi duke mos e dekretuar ligjin.
Duke përshëndetur aktin e tij, gjej rastin të paraqes arsyet kryesore përse Korporata e Investimeve është një projekt kriminal në kurriz të shqiptarëve.
Së pari, kanalizon çdo pronë publike dhe private në duart e kryeministrit (Arkitektit real të këtij projektligji).
Së dyti, me pushtetin ndaj çdo prone publike dhe/ose private në vend, kryeministri do të shpërndajë pronat tek oligarkët.
Në këtë mënyrë do marrë tagrin që në vazhdim të koncesionojë edhe shpatet e maleve.
Akti i presidentit ndonëse i dobishëm është shpresë pak pasi mazhoranca e drejtuar nga PROSSH (Partia e Rilindur e Oligarkëve Socialistë të Shqipërisë) duke përfituar nga mungesa e Gjykatës Kushtetuese do ta rrëzojë përsëri këtë ligj siç ka bërë me shumë të tjerë të kthyer nga presidenti.
KISH është akti parafundit dhe pas tij do të vijë ligji i shpronësimeve që do zhvlerësojë pronën private.
Koha për sugjerime, amendime e këshilla ka kaluar. Kur çdo ligj që votohet është në dëm të interesit publik, kur nuk miratohet një ligj i vetëm që t’i japë prioritet të pamundurit, pronarit, studentit e fermerit.
Përherë ligjet e kësaj mazhorancë janë anti-treg dhe në favor të një grupi të vogël atëherë kjo nuk quhet më qeveri e njerëzve dhe për njerëzit!
Koha e kësaj qeverie ka mbaruar dhe në arrogancën e vendimeve të atyre që po largohen po bëjnë dëm buxhetit ta shtetit dhe pronave të shqiptarëve. Kushdo që abuzon do paguajë. Kushdo që përfiton nga burimet shtetërore do paguajë”.
