Duke folur për situatën aktuale me krizën e shkaktuar nga koronavirusi në vend, Presidenti i Republikës, Ilir Meta është shprehur se detyra e tij është që t’i kërkojë qeverisë që t’i japë pandemisë prioritetin që kërkon.
Meta u shpreh, duke cituar edhe FMN, se nga menaxhimi i kësaj krize, varet edhe ringritja e ekonomisë në të ardhmen.
Duke iu referuar shifrave, ndërsa tregonte se të ardhurat për banorë në vendin tonë kanë rënë ndërsa borxhi është rritur, këto tregues sipas kreut të shtetit duhet të jenë prioritet për qeverinë, dhe jo raporti i Dick Marty-t.
“Ngarkoj me përgjegjësi për atë prioritet që i është dhënë pandemisë, jo vetëm nga ana shëndetësore, por edhe nga ndihma sociale, dhe ndihma për bizneset…Kam kthyer gjithë ato PPP, se janë të pajustifikuara. E kam thënë se për 1 banor, në Serbi largohet një, në Shqipëri largohen 12, shkalla e abuzimit me gjoja investimet publike është në përmasa të mëdha.” , u shpreh kreu i shtetit në emisionin ”Log” në ”ABC”.
Po ashtu, presidenti Meta tha se edhe opozita ka përgjegjësinë e saj që ka ikur nga parlamenti.
