Pas protestës së opozitës, duket se zhvillimet politike nuk do të ndalen këtu. Një ditë më parë, Presidenti i Republikës Ilir Meta, në një deklaratë për mediet përsëriti shqetësimin e thellë mbi krizën kushtetuese, institucionale, politike dhe të përfaqësimit ku ndodhet vendi. Ai tha se është i gatshëm që në përputhje me kompetencën që i jep shkronja “gj” e nenit 92 të Kushtetutës, të rishikojë Dekretin për caktimin e datës së zgjedhjeve vendore, dhe të dekretojë një datë tjetër për zhvillimin e tyre. Po kështu, edhe që të vendos në dispozicion mandatin si president, nëse palët e gjykojnë si element për një zgjidhje gjithëpërfshirëse.
“Ashtu siç deklarova me përgjegjësi më 20 mars nga Pogradeci, mbetem i gatshëm që për një zgjidhje që i shërben interesit më të mirë, stabilitetit dhe demokracisë së vendit, të vendos në dispozicion edhe mandatin tim si President i Republikës, nëse palët e gjykojnë edhe këtë element si të rëndësishëm për një zgjidhje gjithëpërfshirëse, që do t’u jepte qytetarëve shqiptarë të drejtën për të zgjedhur edhe Presidentin me votën e tyre të lirë”.
Duke qëndruar në të njëjtën linjë, analisti dhe moderatori i emisionit ‘360 Gradë’, Artur Zheji, nga studio e lajmeve në RTV Ora citoi se presidenti Ilir Meta po bëhet gati që për zgjidhjen e krizës politike, të vërë në tavolinën e diskutimit mandatin e tij.
Sipas Zhejit, referuar informacioneve të tij, Meta nëse do të japë dorëheqjen do t’i kërkojë edhe Ramës të japë dorëheqjen, me argumentin që ‘erdhëm të dy në politikë, dhe të ikim të dy njësoj’.
“Meta thotë që unë jam gati ta vë mandatin tim në tavolinë, por në fakt se kush do ia thotë që vëre këtë, nuk na e ka thënë akoma. Në momentin që nuk do të ketë natyrë provokative, por thjeshtë gazetareske, por do jetë me impostim politik, Meta do ta vërë mandatin e presidentit në tavolinën e çdo lloj bisedimi, që ka si qëllim zgjidhjen e krizës, dhe këtë e kam nga informacione të mijat.
Kjo nuk është e dyshimtë, sepse e ka bërë edhe më parë, 2 apo 3 herë dhe kjo do të thotë që po piqet momenti që mandati i Presidentit të vihet në tryezë, por me reciprocitet. Unë mendoj se nëse Meta do ta bëjë këtë, do ti thotë Ramës: Unë po e jap dorëheqjen, jepe edhe ti. Se erdhëm bashkë në pushtet, ikim të dy bashkë. Kjo do jetë me siguri ftesa më interesante e politikës shqiptare”.
