Situata e rënduar e pandemisë në vend dhe kostoja e lartë e kurimit, për kreun e Partisë Republikane, Fatmir Mediu, mbetet problemi jetik që po hasin shqiptarët sot.
Në takimin me drejtuesit e partisë në njesinë nr 3 në Tiranë, Mediu u ndal edhe tek situata politike në vend, ku kritikoi kryeministrin Rama, se po minon procesin zgjedhor te 25 Prillit.
Për kreun e PR, vendi është kthyer në një regjim korruptiv në dëm të interesave kombetare.
Sipas tij, Rama ka shkatërruar çdo mundësi mirëbesimi dhe bashkëpunimi, për zgjedhje të lira dhe të ndershme dhe kërkon të imitojë presidentin rus, Vladimir Putin i cili ndryshoi kushtetutën me referendum.
Postimi i Mediut në Facebook
Që në fillim të takimit me strukturat e PR në Njësinë Nr.3, – kryetari i PR bëri thirrje për një kujdes të veçantë nga Pandemia e Covid 19.
Shumë jetë kanë humbur, dhe shumë të tjerë kanë kaluar vështirësi të mëdha shëndetësore, dhe pamundësi financiare, për t’u përballur.
Kostoja e kurimit të COVID është disa herë më e lartë se paga mesatare mujore, dhe papunësia e varfëria ka rënduar më shumë këtë situatë.
Zgjedhjet parlamentare të 25 Prillit kanë një rëndësi kombëtare.
Rama ka shkatërruar çdo mundësi mirëbesimi dhe bashkëpunimi, për zgjedhje të lira dhe të ndershme.
Si asnjëherë më parë, nuk ka një reformë zgjedhore, për të zbatuar rekomandimet e OSBE/ODHIR-it.
Me qëllim të qartë manipulimi, ai ndryshoi Kushtetutën dhe Kodin Zgjedhor pa opozitën, në kundërshtim me kërkesat e Bashkimit Europian dhe kushteve të Gjermanisë.
Për këtë arsye, vendet anëtare të BE, janë kundër hapjes faktike të negociatave ndërmjet konferencës ndërqeveritare, që pritej të zhvillohej, nëse Shqipëria do të plotësonte kushtet e vendosura nga Bundestagu Gjerman.
Ndryshimet kushtetuese që bëri Rama, nuk janë praktikë e asnjë vendi të NATOs, apo vendeve që duan të bëhen pjesë e BE.
Edhe Putini, që Rama kërkon të imitojë, e ndryshoi Kushtetutën me referendum.
Regjimi i korruptuar në pushtet, nuk ka asgjë të përbashkët me BE-në, sepse Bashkimi Europian është çdo gjë e kundërt me atë që ka ndërtuar Rama, është respekt për qytetarët, Kushtetutën, ligjin, institucionet, është luftë kundër korrupsionit dhe krimit, është standart ekonomik dhe social.
