Teksa pret radhën për të marrën mandatin e deputetit, kreu i Partisë Konservatore, Kujtim Gjuzi po kalon disa probleme në jetën e tij bashkëshortore.
Në një prononcim për “Gazeta Shqiptare”, kandidati për deputet nga listat e PD-së, shprehet se gruaja ka paraqitur me datë 20 shkurt një kërkesë për divorc, ndërsa thekson se këto lajme tani përhapen nga armiqtë e tij në politikë, të cilët, sipas tij janë shtuar shumë kohët e fundit.
“Më kanë hyrë edhe në shtëpi, jo vetëm me lajme. Në datë 19 shkurt kunata ime, motra e gruas më ka nisur një mesazh fyes, shumë fyes dhe unë i kam bërë një kallëzim penal zonjës.
Bashkëshortja më ka kërkuar ta tërheq kallëzimin dhe unë i thashë jo, nuk e tërheq. Të nesërmen, pra me datë 20 shkurt ajo ka paraqitur një kërkesë për divorc. Si unë dhe bashkëshortja jemi ende në një shtëpi, pra nuk është përfundimtare ndarja. Them që më janë futur në shtëpi, pasi nipi i kunatës dhe gruas time është nënkryetar i bashkisë Shkodër. Kanë ndërhyrë gjithandej me presione dhe kërcënime që unë mos të marrë mandatin”, tha Kujtim Gjuzi.
