Me mjaft interes të shtuar është se çfarë plani ka qeveria, në lidhje me menaxhimin e situatës së koronavirusit. Rama i ktheu përgjigje PD-së, duke konfirmuar se spitalet janë larg kolapsimit. Ai foli për një rritje të numrave që ishte e parashikuar, dhe se ekspertët kanë një strategji të vjeshtë-dimrit. Kreu i qeverisë shtoi se Covid 4 është gati, dhe pret që të hyjë në sistem në funksion të kujdesit për ata që kanë nevojë të shtrohen, e ndërsa testet e shpejta do të hyjnë së shpejti në proces.
“Asgjë nuk është jashtë parashikimeve. Rritja e numrave ishte e parashikuar. Kemi një strategji të vjeshtë-dimrit që është e shkruar e zeza në të bardhë.
Ministrja ka folur çdo ditë për rrezikun e madh të valës së dytë, si rezultat i relaksimit dhe i marrjes lehtë të kësaj përballje pasi u kalua një fazë e ndërmjetme ku faktikisht gjërat u duken sikur po shkonin drejt normalitetit.
S’ishte e vërtetë dhe ajo që dua t’ju them me bindje është që po bëjmë gjithçka dhe askush tjetër askund s’po bën më shumë. Është fatkeqësi e madhe që një parti që pretendon se do bëhet shumicë, siç ka pretenduar në fakt prej shumë vitesh dhe pretendimi ka rezultuar i tepruar dhe që do të qeverisë vendin pas 25 Qershorit siç u lajmërua dje nga kryetari i PD-së në dilemën e tij mes shifrave dhe që përsërit çdo ditë që spitalet janë në kolaps, përsërit çdo ditë që në Shqipëri nuk po bëhen teste, që duhet bërë kjo e ajo a thua se është i autorizuar nga ndonjë mandat eksperti, është e dëmshme, shumë e dëmshme.
Spitalet janë larg së qeni në kolaps. Vetëm para dy ditësh është hapur Covid 3. Covid 4 është gati dhe pret që të hyjë në sistem në funksion të kujdesit për ata që kanë nevojë ë shtrohen, ndërkohë që dua që t’ju informoj kam pasur një bisedë të gjatë me ekspertët e Komitetit Teknik, dhe është e nevojshme të mësohet se ne nuk i numërojmë testet që numërohen në privat përveçse pozitivet, pra në rastet e pozitivitetit të testeve. Kjo përfshihet në statistikat e përditësuara, por numri i testeve që i jepet publikut është vetëm ai i bër në institucionet publike dhe ne nuk kemi teste së shpejta jo sepse nuk i gjenim dot por sepse është parë e arsyeshme që të testohet vetëm me PCR. Testet e shpejta do të hyjnë së shpejti në proces”.
Kryeministri Rama shtoi më tej se ka besim tek ekspertët, dhe se vepron çfarë u sugjerojnë ata.
“Thënë të gjitha këto, sepse janë çështje ekspertësh, unë thjesht e kam thënë dhe përsëritur, bëj atë që sugjerojnë ekspertët dhe kam besim absolut tek ata njerëz. I kam parë, i kam dëgjuar dhe kam mundur të shoh që vazhdimisht fjala e tyre ka dalë kur i thonë. Ama nëse dikush do t’i japë përgjigje pyetjes përderisa Lulzim Basha, paska gjetur formulën që ta frenojë infeksionet duke i çuar testet nga X në Y, si ka mundësi që këtë formulë nuk e kanë gjetur as Gjermania, as Franca dhe asnjë vend tjetër që kanë bërë një numër të madh testesh?
Sepse nuk ka lidhje fare dhe në këtë betejë, në këtë lufë e shikojmë, që nuk ka gjëra të shkruara në gurë. Ekspertët më të mëdhenj dhe më të famshëm para X kohësh thonin maska nuk bën punë, pastaj filluan thanë në mjedise të mbyllura, pastaj thanë edhe jashtë”.
