Prej ditësh tashmë, Mbretëria e Bashkuar vijon të raportojë bilancin më të rëndë ditor, për kontinentin e Evropës.
Në 24 orët e fundit numri i viktimave është rritur sërish, në krahasim me një ditë më parë. Sipas mediave britanike, 768 persona kanë humbur jetën gjatë 24 orëve të fundit, 130 më shumë se dje ku u regjistruan 638.
Ndërkohë një rritje të konsiderueshme ka pasur edhe në identifikimin e rasteve të reja. Në 24 orët e fundit, janë regjistruar 5,386 raste të reja, në krahasim me dje ku u regjistruan 4,583.
Deri më tani në Mbretërinë e Bashkuar janë shënuar 143,464 raste infektimi, duke e bërë atë një nga vendet më të prekura nga virusi vdekjeprurës.
Mbretëria e Bashkuar renditet e pesta për numrin më të madh të viktimave (19,506), pas SHBA-ve (50,370), Italisë (25,549), Spanjës (22,524) dhe Francës (21,856).
Më shumë se 2,7 milionë njerëz nga e gjithë bota janë prekur nga COVID-19, ndërsa mbi 193 mijë persona kanë humbur jetën.