FSHF i çon qeverisë propozimet për rinisjen e kampionatit të futbollit

Pas vendimeve të djeshme të Komitetit Ekzekutiv të Nionit, federatat anëtare të UEFA-s kanë hartuar e kontaktuar qeveritë përkatëse në lidhje me rifillimin e aktiviteteve futbollistike. Këto të fundit janë ndërprerë që në fillim të muajit mars, në kuadër të masave për frenimin e koronavirusit.

Po kështu ka vepruar edhe Federata Shqiptare e Futbollit. Sekretari i Përgjithshëm i FSHF-së, Ilir Shulku, ka dërguar një shkresë zyrtare dy ministrive, asaj të Shëndetësisë, dhe ministrisë së linjës.

Në letrën për krerët e dikastereve, Ogerta Manastirliu dhe Besa Shahini, ai ka propozuar që klubet e futbollit të rinisin stërvitjet më 2 maj, ndërsa 18 ditë më pas, më 20 maj, të fillojë aktiviteti.

FSHF kërkon që aktiviteti të zhvillohet me dyer të mbyllura dhe nën masa të rrepta higjieno-sanitare, për të garantuar kështu shëndetin e sportistëve dhe personave të tjerë të përfshirë direkt në një 90-minutësh futbolli. FSHF premton nga ana e saj rigorozitet, teksa mbetet e hapur për diskutim dhe bashkëpunim me dy ministritë në ditët në vijim.