Mbi 110 mijë të infektuar, si paraqitet gjendja nga koronavirusi në Turqi

Situata nga koronavirusi në Turqi vijon të jetë e rëndë, teksa numri i viktimave të shënuara brenda ditës mbetet i lartë.

Në 24 orët e fundit, në Turqi kanë humbur jetën 99 njerëz ndërsa janë konfirmuar 2,357 raste të personave të infektuar.

Deri më tani, Turqia regjistron 2,805 viktima në total nga virusi COVID-19. Me më shumë se 110 mijë raste infektimi, Turqia renditet e shtata në botë për numrin më të madh të personave të infektuar, pas SHBA-ve, Italisë, Spanjës, Francës, Gjermanisë dhe Mbretërisë së Bashkuar.

Mbi 29 mijë njerëz në Turqi kanë arritur ta mposhtin virusin vdekjeprurës. Ndërkohë, 78,185 raste mbeten ende aktive, teksa 1,776 prej tyre ndodhen në gjendje të rëndë shëndetësore.

Rreth 3 milionë njerëz nga e gjithë bota janë prekur nga COVID-19, ndërsa mbi 206 mijë persona kanë humbur jetën.